Tashkent (UNA) – Midowga Wakaaladaha Wararka ee Ururka Iskaashiga Islaamka (UNA) ayaa heshiis iskaashi dhanka warbaahinta ah la saxiixday Wakaaladda Wararka ee Dunya ee Wasaaradda Arrimaha Dibadda ee Jamhuuriyadda Uzbekistan, inta lagu guda jiro kulan rasmi ah oo ka dhacay caasimadda Tashkent.
Heshiiskan iskaashiga ah ayaa waxaa dhanka UNA u saxiixay Agaasimaha Guud ee Hay’addaasi, Mudane Mohammed bin Abdul Rabbo Al-Yami, iyadoo dhanka Wakaaladda Wararka ee Dunya u saxiixay Mudane Akroor Burkhanov oo ah La-taliyaha Wasiirka Arrimaha Dibadda iyo Xoghayntiisa Warfaafinta.
Kulanku waxa uu dib u eegis ku sameeyey qorshaha fulinta ee UNA, kaas oo ujeedadiisu tahay in Jamhuuriyadda Uzbekistan laga taageero dhinaca warbaahinta iyada oo kor loo qaadayo fursadaha horumarineed iyo maalgashiga iyo kor u qaadista joogitaankeeda wanaagsan ee muuqaalka warbaahinta ee dalalka xubnaha ka ah OIC iyada oo loo marayo xarumaha Ururka.
Qoraalkan ayaa ujeedadiisu tahay sidii kor loogu qaadi lahaa iskaashiga warbaahinta labada dhinac ee dhinacyada is dhaafsiga wararka, tabinta wadajirka ah, hirgelinta barnaamijyada tababarada, iyo horumarinta agabka warbaahineed ee ka tarjumaya qiyamka la wadaago iyo xoojinta xiriirka isfahanka ee ka dhexeeya shucuubta caalamka Islaamka.
Al-Yami waxa uu carabka ku adkeeyay in qoraalkani uu ka dhigan yahay tallaabo istiraatijiyad ah oo loo qaaday dhanka xoojinta iskaashiga hay’adaha warbaahinta Uzbekistan, uuna ku soo beegmayo qaab-dhismeedka ballan-qaadka Midowga ee ku aaddan taageeridda waddamada xubnaha ka ah si ay u muujiyaan guulahooda heer gobol iyo heer caalami iyaga oo adeegsanaya warbaahin xirfad leh oo lagu kalsoonaan karo.
Dhankiisa, Burkhanov ayaa ammaanay doorka UNA ee dhismaha buundooyinka iskaashiga warbaahinta ee u dhexeeya dalalka Islaamka, isagoo muujiyay inuu rajeynayo in qoraalkani uu ka qayb qaadan doono furitaanka aragtiyo cusub oo isgaarsiineed, isdhaafsiga khibradaha, iyo xoojinta joogitaanka warbaahinta wadajirka ah.
(waa dhamaatay)
