Doha (UNA/QNA) – Ministan harkokin wajen Jamhuriyar Azarbaijan Jeyhun Bayramov ya bayyana harin da Isra’ila ta kai kan kasar Qatar a matsayin wani mummunan hari da kuma babbar barazana da za ta kara ta’azzara halin da ake ciki a zirin Gaza da kuma zurfafa bala’in jin kai a can.
A jawabin da kasarsa ta yi a wajen taron gaggawa na kasashen Larabawa da Musulunci da aka yi a birnin Doha a jiya, Litinin, ya tabbatar da cewa kasarsa na goyon bayan Qatar wajen tunkarar wannan ta'addanci, yana mai yabawa kokarin Doha na shiga tsakani na kawo karshen hare-haren wuce gona da iri kan Gaza da kuma cimma sulhu kan rikicin cikin lumana.
Ya kuma yi kira da a mutunta yarjejeniyar Majalisar Dinkin Duniya tare da neman kawo karshen yakin Gaza ta hanyar tattaunawa da daukar matakan da suka dace don kaucewa kawo cikas ga tsaro a yankin. Ya ce dole ne dukkan bangarorin da abin ya shafa su yi kokarin ganin an cimma yarjejeniyar tsagaita bude wuta cikin gaggawa, da inganta tattaunawa, da kuma dakile matsalar.
Ya jaddada wajibcin neman warware matsalar Palasdinawa cikin lumana bisa tsarin kasashe biyu, bisa ga dokokin kasa da kasa da kuma kudurorin MDD da abin ya shafa, yana mai kira da a mutunta muhimman hakkokin al'ummar Palasdinu, "domin wannan al'ummar sun cancanci rayuwa cikin mutunci da zaman lafiya."
(Na gama)
