zaunannen kwamitin hadin gwiwa a fannin kimiyya da fasaha na kungiyar hadin kan kasashen musulmi ta COMSTECH yana ci gaba da karfafa dangantakarsa da kasar Sin a fannonin kimiyya da fasaha da kiwon lafiya, wanda ke nuni da muhimmancin hadin gwiwar kimiyyar kasa da kasa, da kuma bunkasa dangantakar abokantaka bisa manyan tsare-tsare a tsakanin bangarorin biyu.
Farfesa Dr. Muhammad Iqbal Chaudhry, babban jami'in hukumar COMSTECH, ya bayyana shirye-shiryen hadin gwiwa daban-daban tsakanin COMSTECH da kasar Sin a fannonin kimiyya da fasaha da kiwon lafiya a yayin wani biki da aka gudanar yau a Islamabad.
Har ila yau, ya nuna jin dadinsa ga gudummawar da Farfesa Dr. Xinmin Liu, fitaccen masanin kimiyyar kasar Sin ya bayar, wajen inganta hadin gwiwar kimiyya tsakanin Sin da Pakistan cikin shekaru 25 da suka gabata, Dr.
Ya bayyana cewa an baiwa Dr Shenmin lambar yabo ta Quaid-e-Azam Stamp saboda kokarin da ya yi, wanda ya kasance daya daga cikin lambobin yabo mafi girma na farar hula a Pakistan da ake baiwa baki.
Farfesa Dr. Iqbal Chaudhry ya lura cewa COMSTECH tana taka muhimmiyar rawa wajen aiwatar da kudurorin OIC da suka shafi kimiyya, fasaha, kiwon lafiya, aikin gona, ilimi mai zurfi, da sauyin yanayi.
Ya bayyana cewa, Sin da COMSTECH na kokarin karfafa hadin gwiwar kimiyya a muhimman fannoni kamar binciken likitan sararin samaniya, ilimi mai zurfi, da bunkasuwar tattalin arziki bisa kirkire-kirkire. Jami'o'in kasar Sin, irin su jami'ar likitanci ta Xinjiang, da jami'ar Ningbo, da jami'ar Hunan ta likitancin kasar Sin, suna horar da masu bincike na kasar Pakistan a cibiyar nazarin kimiyyar sinadarai ta kasa da kasa, da jami'ar Hamdard, da na jami'ar Lahore, inda ake sa ran wadannan tsare-tsare za su kara karfin bincike na Pakistan, da jawo jari, da kuma sa kaimi ga ci gaban fasaha.
A nasa bangaren, Farfesa Dr. Xinmin Liu ya nuna jin dadinsa ga gwamnatin Pakistan da ta ba shi wannan babbar lambar yabo ta farar hula.
Ya yabawa yadda COMSTECH ke ci gaba da ba da goyon baya wajen inganta hadin gwiwar kimiyya tsakanin kasashe mambobin kungiyar OIC da kasar Sin, yana mai jaddada muhimmancin ci gaba da hadin gwiwa wajen raya bincike da kirkire-kirkire.
(Na gama)
