A ranar Talata, 22 ga Yuli, 2025, Mai girma Shugaban Asusun hadin kan Musulunci, Mista Mohammed bin Sulaiman Aba Al-Khail, ya ziyarci hedikwatar Jami'ar Musulunci da ke Uganda. Shi da tawagarsa sun samu tarba daga mai girma Farfesa Ismail Simbwa Jagenda, daraktan jami'ar musulunci ta Uganda, tare da wasu malamai da ma'aikatan jami'a.
Taron ya shaida rattaba hannu kan yarjejeniyar bayar da tallafin kudi da asusun ya baiwa jami'ar Musulunci ta Uganda. Yarjejeniyar dai na da nufin tallafawa guraben karo ilimi da aka ware wa daliban Sudan mabukata, domin aiwatar da shawarwarin da aka cimma a zaman majalisar din-din-din na asusun karo na 68, inda aka amince da wasu ayyukan ilimi da ci gaba a kasashe mambobin kungiyar hadin kan kasashen musulmi.
Bikin rattaba hannu kan yarjejeniyar ya samu halartar mai girma Ambasada Ahmed Ibrahim Jarada, jakadan Jamhuriyar Sudan a Jamhuriyar Uganda, wanda ya yaba da rawar da asusun hadin kan Musulunci ke takawa wajen tallafawa fannin ilimi da bincike na kimiyya da bayar da tallafin karatu ga dalibai a kasashe mambobin kungiyar ta OIC.
(Na gama)
