Istanbul (UNA/QNA) – Shugaban kasar Turkiyya Recep Tayyip Erdogan ya soki matakai biyu na masu fafutukar kare hakkin bil’adama da ‘yanci a kasashen yammacin duniya a lokacin da suke takama da su ga duniya amma suka yi shiru kan kisan kiyashi da kashe kananan yara a Gaza a hannun haramtacciyar kasar Isra’ila.
A cikin wata sanarwa da Erdogan ya fitar a daren jiya ya ce gwamnatin sahyoniyawan Benjamin Netanyahu da ke ci gaba da zubar da jini da hawaye, ta keta yarjejeniyar tsagaita bude wuta a makon da ya gabata tare da ci gaba da kisan kiyashi a Gaza.
Ya kuma jaddada cewa, gwamnatin Turkiyya za ta kara zage damtse wajen ganin an kawo karshen kisan kiyashi da ake yi a zirin Gaza gabanin sallar Idi.
Shugaban kasar Turkiyya Recep Tayyip Erdogan ya bayyana cewa sama da Falasdinawa 700 ne suka yi shahada a cikin watan Ramadan sakamakon hare-haren da sojojin haramtacciyar kasar Isra'ila suka kaddamar.
Ya bayyana cewa ainihin abin takaicin abin da ke faruwa a zirin Gaza ya ta’allaka ne a kan rashin mutuntawa da kasashen duniya da dama musamman gwamnatocin kasashen yammaci suke nunawa a kan zaluncin da ake ci gaba da yi a can.
Erdogan ya kara da cewa, Gaza da Falasdinu suna wakiltar misali mafi zafi na nuna wariya bisa launi da akida daga masu da'awar kare hakki da doka, yana mai cewa wasu bangarorin suna sauya kalamansu yayin da wadanda ake zalunta Falasdinawa ne, kuma wadanda ake zalunta 'yan Isra'ila ne.
Shugaban na Turkiyya ya jaddada cewa zalincin da Falasdinawa ke fuskanta a Gaza zai kawo karshe kamar yadda aka kawo karshen zaluncin da Siriyawa ke fuskanta a baya.
(Na gama)
